Kinniget eo bet ar c'heleier get Aodren Trehin ar mintin-mañ.

Spontus eo ar c'hementad bezhin glas a vez dastumet àr aodoù bae Douarnenez en hañv-mañ, hag e Breizh dre vras.

Kroget e oa al lanv glas e fin an Nevez-Amzer ha strewet e vez ur c'hementad uhel pe uheloc'h a vezhin àr an aodoù get ar mor diouzh ar meteo. Traezhennoù ar Riz ha Trezmalaouen, e Douarnenez hag e Kerlaz, eo ar re saotretañ er bae. N'eus ket bet dastumet gwezh erbet kement a vezhin glas àr traezhenn ar Riz da skouer eget ar blez-mañ : 1394 metrad kub a zo bet dastumet eno dija a c’houde penn kentañ ar c'houlzad. Ha div wezh muioc'h àr traezhenn Trezmalaouen. Stegnet eo ar boblañs get an tem-se.

Al lezenn Duplomb a aotreay bremañ astenn an dachennoù pe an atantoù betek 5000 penn morc'h, e lec'h 3000 a-raok. Ha daoust d'ar bae bout àr takad mirva naturel an Hirwazh, e aotrea ar park kreskiñ ment an dachennoù. 'Pezh a zegasay él rezon, muioc'h c’hoazh a vezhin en dazont.

Maxime Touzé a zo dilennad en ti-kêr en tu enep. Aterset e oa bet get Metig Jakez-Vargas.

Ha da glevet er c'heleier:

-Gouarnamant Liban a raktresa disarmiñ an Hezbollah.
-Emañ an FNLKS, strollad dizalc’hour Kaledonia-nevez, àr bouez rein e sav-poent ofisiel diàr-benn emglev Bougival.

-Monet a ra àr-raok ar raktres lemel daou devezh gouel douget get François Bayrou.

-Ar barrad tommder kroget digwener paset a baday betek fin an dibenn-sizhun.

-Un tamm keloù ag al lezenn Duplomb a oa bet embannet dec'h get Emmanuel Macron.