Kinniget eo bet ar c'heleier get Aodren Trehin ar mintin-mañ.

Glac'haret eo c'hoazh bed ar brezhoneg. Aet eo Erwann Denez d'an anaon d'ar 17 a viz Gouere.

Dalc'het eo bet e obidoù dec'h e Lanniliz. Kelenn e skolaj Diwan ar Releg en doa bet graet Erwann Denez, met dreist-holl e oa bet é labourat e-pad ouzhpenn 20 vlez er gevredigezh An Oaled e Treglonoù. Eno eo bet degemeret un toullad bugale ha krennarded evit bevañ e brezhoneg e diavaez ar skol.

Silvenn Koant hi deus labouret getañ e-pad 15 vloaz. Selaouomp anezhi doc’h mikro Pauline Daniel ag Arvorig FM.

Anza he deus graet berzh en Erer kozh disul. Kanet he doe e brezhoneg e-korf sonadeg an arzourez vrudet Zaho de Sagazan.

Kanet he doe La Symphonie des Eclairs, da lâret eo Kanenn al Luc’hed e brezhoneg, ha dek mil den ha tri-ugent o doe selaou anezhi. Goude-se e oa bet gwelet ar video get ouzhpenn ur milion hanter a dud àr ar rouedadoù sokial.
Bet oa Bleuenn Al Lae da gejañ get Anza Henry hag he zad àr marc’had Rostrenn dec’h.

Ha da glevet ivez er c'heleier:

-Spontus eo stad ar c’hazetennourezed hag ar gazetennourion e Gaza.

-Ar Stadoù-Unanet a guita, ur wezh ouzhpenn, an Unesco.

-Tizhet get un enklask, nac’hañ a ra ar rouedad sokial X kenlabourat get ar justis gall.

-Goulenn a ra parked Pariz kas diviz dieubidigezh Georges Abdallah el lezvarn torr, al lezvarn vroadel uhelañ.