E miz Gouere e oa bet Marilou Andro o veajiñ e Ecuador, gant sikour ar gevredigezh Zellidja, 'blam' d'en em gavet asambles gant ar re a zo bet laeret ha distrujet o douaroù gant Texaco. E-doug ar bloavezhioù 60 e oa staget Texaco da glask petrol e koad Ecuador hag hep dihan ebet e oa bet saotret an natur gantañ eno neuze. Buhez ar pobloù bihan a oa bet lakaet diaes ivez, koulz hini an Ameridianed hag hini an hinored baour a veve pell eus ar c'hêrioù bras.