Ur bloaz dreistordinal e vo 2015 e-keñver ar mareoù. 40 mare ouzhpenn 100 a wezhiader, 20 anezho ouzhpenn 110. Div wech muioc'h eget er bloavezhioù tremenet hag e c'hortozomp mare ar c'hantvet d'an 21 a viz Meurzh : 119 a wezhiader o c'houzout eo 120 ar c'hreñvañ... Ur chañs evit ar besketaerien pa 'vez izel ar mor, evit ar re sot gant gwagennoù diroll pa 'vez uhel. En abadenn emañ Lulu Moisan, animatourez natur e Fouen, o tisplegañ penaos e ya da gelaouiñ ar besketaerien war an draezhenn ha Gwenole Guevel, bet meteorologour e Meteo France, o kinnig efedoù chañjamant an hin war ar mor.