Kinniget eo bet ar c'heleier get Aodren Trehin ar mintin-mañ.

Faotiñ a ra d’an Deskadurezh Stad serriñ ur c’hlas evit re zo en trede klas e bep a skolaj e Sizun hag e Plouneour-Menez !

Harzoù-labour, manifestadegoù ha dasparzh traktoù a zo graet a c’houde pemzektez evit difenn an daou skolaj a zo e Menez Are. Arguzenn an Deskadurezh Stad eo e ya àr zigresk an niver a skolajidi a zo bet lakaet o anv gete en trede klas evit an distro-skol e miz Gwenholoñ. Pezh n’eo ket gwir evit Matthieu André a zo kelenner e skolaj Val d’Elorn e Sizun. Emañ get Erwan Blanchard.

Ha da glevet ivez er c'heleier:

-Ur wagenn tommder a zo e Bro-C’hall hiriv hag arc’hoazh, ha marse e vo betek dimerc’her pe diriaou, hervez an takadoù.

-Disadorn e oa Pride difennet Budapest e bro Hungaria.

-Raktres reform ar c’hleweled publik a vo studiet er vodadenn vroadel hiriv hag arc’hoazh.

-Astennet eo bet listenn al lec’hioù m’eo difennet butuniñ.

-Bodet e oa tud en un 60 kêr bennak e Frañs disadorn a-enep al lezenn Duplomb.

-Un tolpadeg a-enep an tourioù-avel àr vor a oa bet en Erdeven, kostez an Alre.